Benvidos ao noso blogue Aliménta-t Baliño.
Nel recolleremos todas as actividades e receitas que realicemos dentro do proxecto ALIMÉNTATE BEN no que participamos.
O noso obxetivo é concienciar sobre hábitos de alimentación o máis saudables posibles, coñecendo os diferentes alimentos e as súas características e manipulándoos dun xeito o máis atractivo e motivador que poidamos.
Animádevos a quedar con nós e seguir as nosas alimenta-aventuras!
Arañas, morcegos, momias, nichos, meigas e demais monstruos de Samaín foron convocados no Monte Baliño para preparar unhas terroríficas e medorentas merendas polo Samaín.
Moi afanados en cada cova xunto cos mestres e mestras sabedores de apócemas fedorentamente deliciosas prepararon:
-Momias pizzeiras.
-Torradas arácnidas.
-Nichos de sandía.
-Torradas pantasma...
A que non vos atrevedes a pasar medo comendo coma nós!!!!!??????
A cativada de 3º e 4º, aproveitando que é tempo de marmelos, preparou un delicioso marmelo para logo dar conta del nas nosas sobremesas no comedor. Seguiron as instruccións dunha experta en realizalo na súa casiña, a súa titora a mestra Maite. Lavaron, cortaron, retiraron as sementes do corazón, partiron e puxeron nunha cacerola a lume lento xunto con panela (sustituto do azucre)…Remexeron, esperaron… ata conseguir a textura axeitada… et voilâ!
Esta actividade enmarcada no Plan Proxecta "Nutriescolas" e traballando coordinadamente co Proxecto "Voz Natura", nos que participamos, foi seleccionada e relacionada co proxecto de centro “Coñecendo a provincia: lucus Augusti”. A alimentación e o aproveitamento dos productos que nos da a terra son aspectos fundamentais na nosa terra galega. De aí, a realización de moitas propostas que parten de productos próximos que atopamos en terreos que rodean á nosa escola cedidos por mestres/as, familias… ou incluso da nosa pequena hortiña.
Ademais hai que engadir que as actividades realizadas, teñen un caracter interdisciplinar, xa que se traballan dende as diferentes áreas do currículo (Ciencias Naturais, Matemáticas, Linguas...)
Velaquí podedes ver o resultado.
En canto ao sabor… iso so o podemos saber nós pero asegurámosvos que o disfrutamos!
Os pequenos e pequenas de 1º e 2º, xunto co seu titor Jimmy, investigan sobre o Reino Vexetal, na área de Ciencias Naturais, e decidiron profundizar no coñecemento deste producto, O MILLO e as súas posibilidades.
Empregaron os sentidos para ver, ulir, manipular…facendo diferentes actividades co millo: debullar, contar, clasificar en grupos de 10 (aproximación á decena), debuxar, coñecer a planta e as partes (follas, carozo…) e ata aprendemos unha canción que conta moitas cousiñas de cal é o proceso a seguir para obter fariña do millo. Temos pendente intentala facer nós mesmos!
Grazas a ANPA da nosa escola, os pequenos e pequenas habitantes do Baliño, realizamos unha excursión a unha granxa próxima situada na Láncara e chamada O Palomar. Seguimos coñecendo a nosa galicia, e en concreto a nosa provincia, Lugo, achegándonos ao noso entorno, abrindo as portas das aulas e aprendendo fóra delas. O noso pdi "Coñecendo a provincia: Lucus Augusti" parece que nos pode dar para moito.
O Palomar, é unha granxa familiar de gando vacún de leite en intensivo, con recría en extensivo e sistema de muxido. Realizamos diferentes actividades: interactuar coas vacas e alimentar aos xatos con biberón, obradoiro de muxido dunha vaca, escoitar video-conto en primeria persoa da vaca Salomé, obradoiro de facer queixo fresco a mans da avoa Carme (escoitando as súas directrices e experiencias) e finalmente degustando uns deliciosos produtos derivados do leite: queixo, tortas, biscoito, leite fervido, iogures naturais...
A nosa teacher Nati e a nosa auxiliar de conversa Anj, están realizando co alumnado de diversas aulas actividades relacionadas coa unidade de FOOD.
Nas sesións desta semana aprenderon xogando e bailando. Realizaron actividades de vocabulary, gramática "I like..." "I don' t like...", elección "choose your favourite food", xogos coordinación/asociación movementos corpo con palabra escoitada "I say orange"- "You clap your hands", "I say watermelon"- "You hands up".
Hoxe, coa teacher Nati, na clase de Inglés, a cativada de 6º de Infantil realizaron unha actividade enmarcada dentro da unidade FOOD (alimentos). A teacher seguiu na liña de aprender explorando, estimulando e espertando os sentidos. Neste caso, os sentidos do tacto e do olfacto!!
Cunha venda nos ollos introducimos as nosas mans nunha bolsiña na que previamente, a teacher, incorporara diferentes alimentos. Primeiro a través do tacto, probamos o xogo con alimentos de xoguete e despois con algún alimento de verdade (laranxa, mazá, limón, pataca...) Tocamos, logo ulimos e intentamos adiviñar de que se trataba....Por suposto, tiñamos que dicir o que era en Inglés. Un xogo divertido a través do cal aprendemos e reforzamos "vocabulary!"!!
Na aula de 1º e 2º estamos a traballar os sentidos e un dos máis importantes no que a alimentación se refire é o GUSTO.
O profe Jimmy preparou unha actividade para traballar os distintos sabores: doce, amargo, ácedo e salgado. Cada un dos nenos e nenas tiña un platiño con diferentes alimentos: pomelo, chocolate negro, uvas pasas e galletas salgadas. Presentou os alimentos un por un e fomos probando todos e todas á vez o alimento que el dicía. O importante era atreverse e probar alomenos un pouquiño. Fomos todos e todas moi valentes! Posteriormente tiñamos que sinalar a que sabor considerabamos que pertencía. Ao final da actividade, nunha plantilla coloreamos cariñas segundo nos gustara ou non.
Un xeito moi atractivo para ser conscientes dos sabores empregando os sentidos!
Coma os anteriores anos e chegada esta época de festexo do Samaín, os nosos rapaces e rapazas xunto co profesorado botaron a voar a súa imaxinación e coa axuda das pescudas en Google.... prepararon por grupos de nivel unhas deliciosas merendas medorentas con froitas e diferentes ingredientes saudables. Logo compartímolas todos xuntos no recreo da mañá...
Que medo máis saudable tivemos hoxe!!! Así moitas veces....
Na aula de 4º,5º de Infantil, e liderados pola titora Lara, dado que estamos en setembro e a contorna que nos rodea está intimamente ligada as tradicións da vendima e a elaboración de viños da Ribeira Sacra, decidiron realizar un vendima de uvas de interior.
Relacionando esta tradición co noso PDI deste curso "Miña terra galega", profundizaron nesta temática, coñecendo as uvas, onde nacen, como se recollen e preguntáronse que se podería conseguir a través delas. A mellor forma de dar resposta a este interrogante, foi mediante a experimentación. Realizaron a colleita e coas súas mans e dedos, machacaron as uvas e déronse conta que poderían extraer un zume...neste caso de UVA.
Unha actividade que pon en marcha tódolos sentidos permitíndolles aprender a través de todas as canles sensoriais, ao mesmo tempo que traballamos motricidade fina e fomentamos a importancia do traballo en equipo.
Estamos de volta... Volvemos as rutinas que tamén as botabamos de menos! Damos por comezado un novo curso, seguro que cheo de aprendizaxes, experiencias e bos momentos.
O plan proxecta Aliménta-t ben no que participamos tamén volve, seguimos inmersos nel coma en anos anteriores, co fin de concienciar ao noso alumnado na importancia dunha alimentación saudable para crecer sans.
Os pequenos e pequenas de Infantil (que son os maiores da súa etapa, xa que xa están en 6º de Infantil) prepararon xunto coa súa titora a mestra Ana, un cartaz con debuxos e cun consello que todos e todas deberiamos ter en consideración: "Se san queres estar, moita froita debes tomar" A que é sinxela para recordar e poder aplicar??
Para ir rematando este curso tan intenso e coas altas temperaturas que estamos tendo 😎😅, ocorréusenos preparar un delicioso batido saudable para refrescar os nosos últimos días de cole.
Así que... dito e feito! A rapazada de 1º e 2º de primaria, moi disposta por certo, foi quen se encargou de todo. Decidimos facer un batido cos seguintes ingredientes: 🍎🍌🍍
amorodos
plátanos
piña
iogur natural
leite
Nada de azucres engadidos!!!
O paso a paso? Moi sinxelo.
Lavar amorodos e retirar as folliñas verdes.
Pelar os plátanos.
Trocear a piña.
Verter todo no batedor, incluindo o leite e o iogur natural
Bater ata desfacer todos os anaquiños de froita.
Meter no frigorífico.
Servir frío e disfrutar...!!😋😋🍹
Pero a cousa amiguiños e amiguiñas, non quedou aí...Tiñamos aproveitar a actividade para facer algo máis. Entón pensamos que poderiamos empregar a robótica para traballar a nosa orientación espacial, a programación, dar indicacións e a lectura. O noso robot tivo que ir recompilando os ingredientes e os pasos da elaboración da receita!
Aquí tendes fotiños do concentrados e concentradas que estabamos...
O noso pequeno horto neste tempo da traballiño pero tamén nos da moitas recompensas...
A rapazada tivo a laboriosa tarefa de plantar leituguiñas para as ensaladiñas que nos "papamos" no comedor e como agasallo, a terriña permitiulles recolectar uns deliciosos amorodos que gozaron comendo...
Nati e Madi prepararon unha nova actividade en inglés co tema da alimentación co alumnado de 1º e 2º. Seguimos a tope coa creatividade e a reciclaxe.
Nesta tarefa traballaron a comida típica americana, aprendendo os nomes, escribíndoos e recoñecendo os alimentos e organizando os seus frigoríficos en tres estantes: bebidas, comidas e sobremesas.
Empregaron caixas de cartón para as súas obras de arte.
O alumnado de 1º e 2º nas súas clases coa teacher Nati e a auxiliar de conversa Madi, estiveron traballando arreo no tema da alimentación.
Nesta actividade que comparten con nós, fixeron brotar as súas dotes artísticas debuxando na columna correspondente ao mesmo tempo que clasificaban entre HEALTHY FOOD e UNHEALTHY FOOD.
Como podedes ver temos uns e unhas artistas capaces de distinguir entre os alimentos que serían saudables e non saudables para alimentar os seus corpos e as súas mentes.
Os máis pequenos e pequenas do Baliño xunto coas súas titoras investigaron en profundidade sobre os OVOS. Como? Pois co mellor xeito de aprender...XOGANDO! E por suposto, empregando tódolos seus sentidos o que permitiu unha estimulación a tódolos niveis: visual, olfativo, táctil...
Comezaron debullando millo para traballar esas mauciñas e a motricidade fina ademáis de recoñecer e identificar os diferentes tipos de millo. Enumeraron as espigas e déronlle de comer a pita do conto, que lles deixou como agradecemento unha sorpresa: UNHA CESTIÑA CHEA DE OVOS!
Con eses ovos... que fixeron? Pois cascáronnos e separaron clara de xema coas súas mans. Traballaron tamén as diferentes formas de cocción do ovo coa asociación imaxe -palabra (lectoescritura) e realizando o grafo das letras que formaban as palabras: fritido, cocido e batido.
Como son moi organizadiños e están moi concienciados co mundo que os rodea, decidiron aproveitar as cascas para abonar a terra da horta do cole.. Aquí non tiramos nada ao que se lle poida dar un novo uso! Machacaron as cascas con moito coidado e coñeceron que esta parte do ovo ten moitas propiedades.
Para ir rematando este miniproxecto, coa axuda dunha pesa, traballaron a lóxica-matemática vendo que ovo pesaba máis: un ovo cocido ou un ovo crú. E como colofón chegou o momento da parte máis divertida na que experimentaron empregando o corpo e gozando cos sorrisos: cos pés descalzos pisaron ovos para descubrir cal era un ovo cocidos e cal era un ovo crú.
Polas fotiños, a verdade e que podemos imaxinar que o pasaron fenomenal e aprenderon un montón.
Moitas grazas as titoras por facer que aprender sexa unha actividade do máis entretida e moitas grazas aos nenos e nenas polos vosas cariñas cheas de ilusión!!
A hortiña do Baliño comeza a ir collendo forma. Chegou a primavera e con ela o tempo de plantar!
O alumnado de 1º e 2º xunto coa súa titora Maite, transplantaron espinacas que pronto medrarán e formarán parte de deliciosos pratos do noso comedor.
Ademais tamén recolectaron os preciosos repoliños que podedes ver e cos que Bea, a nosa cociñeira, preparou un rico e quentiño caldiño nestes días nos que volveu o frío.
A rapazada de Infantil de 3 anos, meteuse de cheo na investigación dos CÍTRICOS nun pequeno proxecto liderado polas súas mestras Tamara e Nati.
Todo comezou coa chegada á aula dunha bolsa misteriosa... que habería dentro? Comezaron a pensar e facer suposicións, e trataron de adiviñar o que había dentro empregando o sentido do tacto. Sabedes o que era? CÍTRICOS(laranxas, pomelos, limóns, limas e mandarinas)!🍊🍋🍊🍋🍊🍋!!
Cando o misterio estivo resolto, puxeron en "jaque" todos os seus sentidos: observaron, uliron, tocaron...
E a partires de aquí, realizaron unha chea de actividades con eles:
Lóxica matemática: Ordearon segundo o seu tamaño de maior a menor
Lectoescritura: asociando froita ao seu nome e escribíndoo.
Motricidade fina: recortando e pegando as letras que compoñían os nomes das froitas; con pinzas recoñecer froitas sumerxíndoas en auga tinguida (da cor dos cítricos) con goteiro sobre mesa de luz.
Creatividade: estampación das diferentes froitas e asociación do nome con selos de letras; bodegón con pinceis e témperas.
Estimulación sensorial: cata de zumes
Estimulación da linguaxe: poñendo fin ao proxecto co recitado dun fermoso poema titulado " Bicos Laranxas"
A continuación deixámosvos un video cos momentos vividos durante este miniproxecto no que abofé que aprenderon e se divertiron moito.
Grazas aos pequenos e pequenas por transmitirnos a ilusión e grazas mestras por facelo posible!!!
Para rematar este ano 2021 e como colofón ao final do trimestre, coincidindo coas datas de Nadal, nas aulas de Infantil, os máis cativos prepararon as súas propias merendas facéndonos partícipes das súas creacións: uns Santa Claus de plátano, fresa e arandos.🍌🍓🍇
A froita sempre é unha boa e saudable opción para as merendas e se a iso lle engadimos doses de diversión, imaxinación e ilusión, o éxito está completamente asegurado.
Por suposto, seguimos a coidar e levar a cabo todas as medidas preventivas contra a Covid: lavado de mans, uso de tapabocas e distancia.
Damos conta de que ademais de aprender facendo e experimentando, gañando en autonomía, pasaron un tempiño ben agradable compartindo cos compañeiros e compañeiras.
Queredes ver o resultado? Confiamos en que a resposta é un gran SÍ... Pois aquí o tendes!
Este lema "- Azucre + Saúde" foi o elixido polo alumnado máis pequecho do Baliño. Xunto coa súa profe Nati levaron a cabo un estudo "científico" de concienciación.
Investigaron sobre o azucre que contiñan determinados alimentos seleccionados. Para elo, buscaron nos envoltorios dos mesmos onde atoparon as cantidades; pesaron o azucre de cada alimento e observaron que as "chuches" e certas bebidas refrescantes contan cunha gran cantidades de azucres que non son bos para a saúde.
Conclusión...
" Ide con coidado co que comedes, non vos deixedes enganar" MOITO OLLO👀👀