Marmelo caseiro no Baliño

 A cativada de 3º e 4º, aproveitando que é tempo de marmelos, preparou un delicioso marmelo para logo dar conta del nas nosas sobremesas no comedor. Seguiron as instruccións dunha experta en realizalo na súa casiña, a súa titora a mestra Maite. Lavaron, cortaron, retiraron as sementes do corazón, partiron e puxeron nunha cacerola a lume lento xunto con panela (sustituto do azucre)…Remexeron, esperaron… ata conseguir a textura axeitada… et voilâ!

Esta actividade enmarcada no Plan Proxecta "Nutriescolas" e traballando coordinadamente co Proxecto "Voz Natura", nos que participamos, foi seleccionada e relacionada co proxecto de centro “Coñecendo a provincia: lucus Augusti”. A alimentación e o aproveitamento dos productos que nos da a terra son aspectos fundamentais na nosa terra galega. De aí, a realización de moitas propostas que parten de productos próximos que atopamos en terreos que rodean á nosa escola cedidos por mestres/as, familias… ou incluso da nosa pequena hortiña.

Ademais hai que engadir que as actividades realizadas, teñen un caracter interdisciplinar, xa que se traballan dende as diferentes áreas do currículo (Ciencias Naturais, Matemáticas, Linguas...)

Velaquí podedes ver o resultado. 

En canto ao sabor… iso so o podemos saber nós pero asegurámosvos que o disfrutamos!

Crema de castañas

 Os nenos e nenas de 1º e 2º xunto con seu titor Jimmy, levaban un tempiño investigando e aprendendo sobre o reino das plantas, proxecto dentro da área de Ciencias Naturais. En concreto e tendo en conta o Pdi da escola “Coñecendo a provincia: lucus augusti”, achegáronse as árbores galegas e lucenses máis comúns que atopamos nas montañas e preto dos ríos Sil e Miño. E como non, unha das árbores por ontonomasia é o noso coñecidísimo CASTIÑEIRO. Ai pero do castiñeiro obtense o froito da castaña… e a castaña está nun ourizo que pincha… como as sacamos de aí? Pois tamén o practicamos, saíndo a recollelos a un souto próximo. Como mola a natureza! 

E aí xurdiuna idea, rematar o miniproxecto cunha receita tamén típica, Crema de castañas, que logo aproveitamos para degustar nunha merenda compartida.

DO HORTO Á CASA: AS NOSAS CABACIÑAS

As nosas cabaciñas, recordade que as sementamos en macetas individuais fai un tempo, viaxan cara as casiñas do alumnado do Baliño....

No cole vímolas comezar a crecer, agora o traballo continúa coa inestimable axuda das nosas familias! Tedes que transplantalas e regalas, para que pronto poidades sacarlle partido recollendo os seus froitos!

Esperamos que fagades un montón de pratos en familia con cabaciña!!!

Grazas pola colaboración!!!!

SEMENTES DE CABACIÑA

Os rapaces e rapazas do Baliño, seguen a coidar do noso pequeno horto, organizando quendas de regadío. Ademáis esta semana queremos trasladar o noso horto á casa. 

Por iso cada un deles e delas, nun testo de reciclaxe (dos gardados doutras plantiñas que trouxemos dos viveiros), puxeron o seu nome e plantaron unha semente de cabaciña que cando teñan un pouco crecida se levará ás casas para observar como medra e poder disfrutar do seu froito.

Aprendemos facendo sobre a orixe dos alimentos e a importancia que a terra ten para os seres vivos!

As mazás

A cativada do Baliño está a traballar un miniproxecto cunha das froitas máis coñecidas: as mazás.

Como o Pdi do noso cole é “Miña terra galega” tiveron claro a froita que elexirían. A nosa terriña está chea de maceiras que agora mesmo se atopan en flor. Que bonita é a primavera!

Desta vez, realizaron un experimento de FLOTACIÓN, para o que, coma bos científicos e científicas, plantexaron as súas hipóteses que posteriormente corroboraron. As mazás flotan ou afunden na auga.? Pois resulta que flotan! 

E xa que estaban, pois aproveitaron para lavalas ben lavadiñas, cortáronnas e prepararon uns espetos de mazá para a súa merenda.

Traballaron aspectos como: hábitos de hixiene e alimentación saudable, autonomía, atención razoamento, motricidade fina, coordinación óculomanual, asociación cantidade (dame/colle tres…), conteo (cantos anacos hai? Cantas mazás temos?, valores coma o traballo en equipo, respecto… Unha actividade moi completa que non acaba aquí…  

Pronto teremos novas destes pequenos e pequenas e as súas aventuras coa froita… Poderedes esperar?

Grazas profe Lara e Alba por compartir con todos as vosas investigacións.

DISTRIBUCIÓN DE LEITE FRESCA NOS TEMPOS DE LECER

Comeza o período de distribución de leite líquido de consumo durante os tempos de lecer dende o día 11 de abril de 2023. 

Esta distribución é posible, grazas a participación na convocatoria de axudas destinadas a suministrar froita fresca, castañas e leite ao alumnado dos centros escolares galegos durante o presente curso 2022-23, xestionado polo Fondo Galego de Garantía Agraria (FOGGA), dependente da Consellería do Medio Rural. 

SEMENTANDO NO HORTO ESCOLAR

Chegou a primavera ao Baliño e comezamos a sementar no noso pequeno horto que tan boas e saudables produtos nos devolve.

Plantamos leitugas rizadas, porro, pepino e calabacíns... Agora tócanos coidalos e que o tempo atmosférico se atope da nosa parte, para poder recoller os froitos e disfrutalos nos menús que nos elabora o noso cociñeiro no comedor.😋😋😋

SEMANAS DE REPARTO DE FROITA FRESCA NOS TEMPOS DE OCIO

Dende o luns 13 de marzo e ata o venres 24 de marzo deste curso, procederase ao reparto de froita fresca durante os tempos de ocio.

Esperemos que gocedes comendo froita rica e saudable!!!

SAÍDA CANGAS: PROGRAMA TI SI QUE ES UN BO PEIXE

O pasado martes 29 de novembro, realizamos unha saída a Cangas, actividade enmarcada dentro do proxecta Aliméntate ben e a modalidade Ti si que es un bo peixe. Esta actividade quedara pendente de facer dende o curso pasado polas limitacións xeradas tras a Covid. 

Por fin, este curso puidemos sair do cole, respirar e estar en contacto coa natureza, neste caso co mundo mariño.🐙🐟

A organización foi impecable e adaptouse perfectamente a todo o alumnado que gozou de todas as actividades propostas: visitar ao porto e a lonxa e o mercado. Ate fixemos un simulacro de poxa. Tocamos, ulimos, vimos, escoitamos as explicacións dadas con agarimo e claridade. Agradecemos moitísimo a dedicación destas persoas e o trato que recibimos pola súa parte.... e por suposto, ao final tamén DEGUSTAMOS unha comida deliciosa preparada a base de produtos do mar: empanadiña de polbo, croquetas de algas e unha sobremesa de compota de mazá deliciosa.

Aquí vos deixamos un video con momentos para lembrar este precioso día no que o tempo tamén nos acompañou!!

POr certo, NORABOA a cativada por portarse tan ben na saída!!!

DEGUSTACIÓN FROITOS SECOS

Estamos no OUTONO e a mestra Maite fixo unha proposta a cativada de 1º e 2º que non puideron rexeitar: realizar unha degustación de diferentes FROITOS SECOS.

Antes de nada e como cada vez que imos manipular alimentos, o importante é a hixiene e polo tanto, tocaba lavar ben as mans. Despois preparamos uns pratiños nos que vertemos diferentes froitos secos: cacahuetes, pistachos, améndoas, abelás, noces... Para identificalos, escribimos en tarxetas os nomes de cada un deles e posteriormente, colocámolos nos pratos.

Chegou a mellor parte... 

COMER!! 

Gozamos cunha merenda distinta en compañía dos nosos compis e duns invitados especiais, os compañeiros e compañeiras da aula de 3º e 4º.

Intentamos ser bos anfitrións e anfitrioas!!

IOGUR NATURAL

A rapazada de 3º e 4º acompañados e supervisados pola súa titora Maite, elaboraron unha receita de Iogur Natural coma antaño se realizaban, dentro da área das Ciencias Naturais na que están a estudar os fermentos.

o iogur é un alimento que se elabora grazas a que hai bacterias que transforman o leite de animais como a vaca. 

Lavaron as mans, vestiron os seus mandís e mans a obra! Que apañados e apañadas! Seguiron as instruccións paso a paso, tal e como volas imos deixar nesta entrada para que o podades realizar nas vosas casiñas. Que hai máis natural que o feito por un mesmo?  E ademais moi san porque non lle engadimos conservantes, nin colorantes nin ningún químico. 

Deixámosvos o PASO A PASO e os INGREDIENTES, ademais das fotos que recollen o momento no que se converteron en "cocinitas". Un traballo en equipo do máis gratificante á par que saudable.

• INGREDIENTES:

        -1 litro de leite (empregamos leite de vaca         caseiro)

        -1 iogur natural

• COMOSE FAI:
• Poñer o leite a quecer ata que ferva, con coidado de que non se bote por fóra do recipiente.
• Deixar arrefriar e cando o leite estea temperado, botar unha cullerada de iogur e remexer ben.
• Verter o líquido nun recipiente con tapa, cubrilo co pano de cociña para que non perda calor e deixalo ás escuras, protexido do frío.
• ou verter en vasiños de cristal, tapar e deixar na iogurteira 12 horas ata o día seguinte.

Por suposto, demos boa conta del, xa que o "zampamos" cando estivo listo nun anaquiño de tempo de ocio.

SABOREA, SABOREA!!: O SENTIDO DO GUSTO

Na aula de 1º e 2º estamos a traballar os sentidos e un dos máis importantes no que a alimentación se refire é o GUSTO.

O profe Jimmy preparou unha actividade para traballar os distintos sabores: doce, amargo, ácedo e salgado. Cada un dos nenos e nenas tiña un platiño con diferentes alimentos: pomelo, chocolate negro, uvas pasas e galletas salgadas. Presentou os alimentos un por un e fomos probando todos e todas á vez o alimento que el dicía. O importante era atreverse e probar alomenos un pouquiño. Fomos todos e todas moi valentes! Posteriormente tiñamos que sinalar a que sabor considerabamos que pertencía. Ao final da actividade, nunha plantilla coloreamos cariñas segundo nos gustara ou non.

Un xeito moi atractivo para ser conscientes dos sabores empregando os sentidos! 

MERENDAS MEDORENTAS CON FROITAS E INGREDIENTES SAUDABLES

 Coma os anteriores anos e chegada esta época de festexo do Samaín, os nosos rapaces e rapazas xunto co profesorado botaron a voar a súa imaxinación e coa axuda das pescudas en Google.... prepararon por grupos de nivel unhas deliciosas merendas medorentas con froitas e diferentes ingredientes saudables. Logo compartímolas todos xuntos no recreo da mañá... 

Que medo máis saudable tivemos hoxe!!! Así moitas veces....

MANTEIS INDIVIDUAIS PARA AS MERENDAS

Os máis pequenos e pequenas do Baliño fixeron unha pequena investigación sobre os alimentos máis saudables e os non tan saudables. Despois, e aproveitando material de refugallo  (catálogos dos supermercados) elixiron diferentes fotos de alimentos sans para crear uns preciosos manteis para as súas merendas. Por detrás, e dándolle vía libre a imaxinación, escribiron os seus nomes e realizaron un debuxo.

A VENDIMA E AS UVAS

 Na aula de 4º,5º de Infantil, e liderados pola titora Lara, dado que estamos en setembro e a contorna que nos rodea está intimamente ligada as tradicións da vendima e a elaboración de viños da Ribeira Sacra, decidiron realizar un vendima de uvas de interior.

Relacionando esta tradición co noso PDI deste curso "Miña terra galega", profundizaron nesta temática, coñecendo as uvas, onde nacen, como se recollen e preguntáronse que se podería conseguir a través delas. A mellor forma de dar resposta a este interrogante, foi mediante a experimentación. Realizaron a colleita e coas súas mans e dedos, machacaron as uvas e déronse conta que poderían extraer un zume...neste caso de UVA. 

Unha actividade que pon en marcha tódolos sentidos permitíndolles aprender a través de todas as canles sensoriais, ao mesmo tempo que traballamos motricidade fina e fomentamos a importancia do traballo en equipo.

Grazas peques polo voso traballiño!!!

SE SAN QUERES ESTAR, MOITA FROITA DEBES TOMAR!!

Estamos de volta... Volvemos as rutinas que tamén as botabamos de menos! Damos por comezado un novo curso, seguro que cheo de aprendizaxes, experiencias e bos momentos. 

O plan proxecta Aliménta-t ben no que participamos tamén volve, seguimos inmersos nel coma en anos anteriores, co fin de concienciar ao noso alumnado  na importancia dunha alimentación saudable para crecer sans.

Os pequenos e pequenas de Infantil (que son os maiores da súa etapa, xa que xa están en 6º de Infantil) prepararon xunto coa súa titora a mestra Ana, un cartaz con debuxos e cun consello que todos e todas deberiamos ter en consideración: "Se san queres estar, moita froita debes tomar" A que é sinxela para recordar e poder aplicar?? 

Pois anímate coma nós e DALLE Á FROITA!!!!

OBRADOIROS "Fai clic ao teu bocata"

O venres 13 de maio recibimos á visita dos organizadores do obradoiro que leva por nome Fai clic ao teu bocata.

Os diferentes grupos de convivencia acompañados polo profesorado foron participando e disfrutando das actividades propostas polos organizadores do obradoiro. 

O alumnado recibiu información sobre alimentación saudable na que as conservas tiveron un especial protagonismo, nunha charla divulgativa dinámica e participativa. Á vez un dos organizadores, foi o encargado de realizar os bocadillos cos seguintes ingredientes: pan artesán, sardiñas, queixo, leituga e tomate natural.

Despois realizaron uns divertidos xogos relacionados co tema.

Deixámosvos coa recopilación visual da realización deste obradoiro no que gozaron e aprenderon... Que mellor maneira!!??

PROXECTO "OS CÍTRICOS" EN 3 ANOS

A rapazada de Infantil de 3 anos, meteuse de cheo na investigación dos CÍTRICOS nun pequeno proxecto liderado polas súas mestras Tamara e Nati. 

Todo comezou coa chegada á aula dunha bolsa misteriosa... que habería dentro? Comezaron a pensar e facer suposicións, e trataron de adiviñar o que había dentro empregando o sentido do tacto. Sabedes o que era? CÍTRICOS (laranxas, pomelos, limóns, limas e mandarinas)!🍊🍋🍊🍋🍊🍋!! 

Cando o misterio estivo resolto, puxeron en "jaque" todos os seus sentidos: observaron, uliron, tocaron...

E a partires de aquí, realizaron unha chea de actividades con eles:

• Lóxica matemática: Ordearon segundo o seu tamaño de maior a menor
• Lectoescritura: asociando froita ao seu nome e escribíndoo.
• Motricidade fina: recortando e pegando as letras que compoñían os nomes das froitas; con pinzas recoñecer froitas sumerxíndoas en auga tinguida (da cor dos cítricos) con goteiro sobre mesa de luz.
• Creatividade: estampación das diferentes froitas e asociación do nome con selos de letras; bodegón con pinceis e témperas.
• Estimulación sensorial: cata de zumes
• Estimulación da linguaxe: poñendo fin ao proxecto co recitado dun fermoso poema titulado " Bicos Laranxas" 

A continuación deixámosvos un video cos momentos vividos durante este miniproxecto no que abofé que aprenderon e se divertiron moito. 

Grazas aos pequenos e pequenas por transmitirnos a ilusión e grazas mestras por facelo posible!!!

 

SANTA CLAUS DE FROITA

Para rematar este ano 2021 e como colofón ao final do trimestre, coincidindo coas datas de Nadal, nas aulas de Infantil, os máis cativos prepararon as súas propias merendas facéndonos partícipes das súas creacións: uns Santa Claus de plátano, fresa e arandos.🍌🍓🍇

A froita sempre é unha boa e saudable opción para as merendas e se a iso lle engadimos doses de diversión, imaxinación e ilusión, o éxito está completamente asegurado.

Por suposto, seguimos a coidar e levar a cabo todas as medidas preventivas contra a Covid: lavado de mans, uso de tapabocas e distancia.

Damos conta de que ademais de aprender facendo e experimentando, gañando en autonomía, pasaron un tempiño ben agradable compartindo cos compañeiros e compañeiras.

Queredes ver o resultado? Confiamos en que a resposta é un gran SÍ... Pois aquí o tendes!

 

 

MENOS AZUCRE MÁIS SAÚDE

Este lema "- Azucre + Saúde" foi o elixido polo alumnado máis pequecho do Baliño. Xunto coa súa profe Nati levaron a cabo un estudo "científico" de concienciación.

Investigaron sobre o azucre que contiñan determinados alimentos seleccionados. Para elo, buscaron nos envoltorios dos mesmos onde atoparon as cantidades; pesaron o azucre de cada alimento e observaron que as "chuches" e certas bebidas refrescantes contan cunha gran cantidades de azucres que non son bos para a saúde.

Conclusión... 

" Ide con coidado co que comedes, non vos deixedes enganar" MOITO OLLO👀👀