Actividades na nosa hortiña e no noso xardín

O Monte Baliño comezou as súas actividades de preparación e mantemento do entorno da escola, xardín e horta.

Actividades interdisciplinares e coordinadas realizadas dentro dos Proxecto "Voz Natura" e Plan Proxecta "Nutriescolas" no que participamos dende o CEIP PLURILINGÜE MONTE BALIÑO. Diferentes grupos, baixo supervisión de mestres e mestras, realizaron diversas tarefas: plantación de arbustos e plantas aromáticas (aproveitando como testos decorativos, neumáticos vellos decorados) e plantación de verduras de tempada e recollida de froitos como a cabaciña que podedes albiscar no video.

  

SEGUIMOS CO NOSO HORTO

 Coa chegada do bo tempo seguimos coa posta ao día do noso horto escolar. Así que aquí nos vendes mans á obra. Limpamos herbiñas malas e plantamos para que pronto poidamos ir recollendo para os nosos menús do comedor.

A cativada do noso centro, a través destas actividades aprenden facendo a orixe dos alimentos e o cultivo da terra, actividade ligada ao PDI do presente curso "Miña terra galega"

PIRIXEL EN ENVASES DE REFUGALLO

Hoxe a rapazada de 3º e 4º de Primaria, dirixidos pola súa titora Maite, empregando envases de botellas de refugallo, plantaron sementes de pirixel de folla lisa para posteriormente trasplantar a nosa horta do cole.

Como vedes seguimos preparando e coidando o noso pequeno horto, para posteriormente aproveitar os produtos obtidos nos menús do noso comedor. É unha actividade de concienciación e visibilización que traballa moitos valores como o coidado da natureza e o medio ambiente, posibilidades que nos brinda o cultivo e aproveitamento do que a terra nos da, seguindo o fío conductor do noso proxecto de investigación común "Miña terra galega".

PROXECTO "OS CÍTRICOS" EN 3 ANOS

A rapazada de Infantil de 3 anos, meteuse de cheo na investigación dos CÍTRICOS nun pequeno proxecto liderado polas súas mestras Tamara e Nati. 

Todo comezou coa chegada á aula dunha bolsa misteriosa... que habería dentro? Comezaron a pensar e facer suposicións, e trataron de adiviñar o que había dentro empregando o sentido do tacto. Sabedes o que era? CÍTRICOS (laranxas, pomelos, limóns, limas e mandarinas)!🍊🍋🍊🍋🍊🍋!! 

Cando o misterio estivo resolto, puxeron en "jaque" todos os seus sentidos: observaron, uliron, tocaron...

E a partires de aquí, realizaron unha chea de actividades con eles:

• Lóxica matemática: Ordearon segundo o seu tamaño de maior a menor
• Lectoescritura: asociando froita ao seu nome e escribíndoo.
• Motricidade fina: recortando e pegando as letras que compoñían os nomes das froitas; con pinzas recoñecer froitas sumerxíndoas en auga tinguida (da cor dos cítricos) con goteiro sobre mesa de luz.
• Creatividade: estampación das diferentes froitas e asociación do nome con selos de letras; bodegón con pinceis e témperas.
• Estimulación sensorial: cata de zumes
• Estimulación da linguaxe: poñendo fin ao proxecto co recitado dun fermoso poema titulado " Bicos Laranxas" 

A continuación deixámosvos un video cos momentos vividos durante este miniproxecto no que abofé que aprenderon e se divertiron moito. 

Grazas aos pequenos e pequenas por transmitirnos a ilusión e grazas mestras por facelo posible!!!

 

IMOS Á COMPRA

 A cativada de 3 anos segue a investigar no tema da alimentación.

Desta volta, velaquí os temos facendo á compra no supermercado, cargando o seu carriño para despois pasar á clasificación dos alimentos mercados.

Para a clasificación, empregaron un semáforo dos alimentos de cores cos seguintes criterios:

• Vermello: alimentos que debemos evitar consumir
• Amarelo: alimentos que debemos consumir en contadas ocasións
• Verde: alimentos que debemos consumir a miúdo. 

Que tal o vedes? 

Opinades o mesmo que os nosos e as nosas pequen@s?

Grazas por compartir con nós a vosa investigación rapazada!!👅

 

NUTELA FEITA NO BALIÑO PARA A SOBREMESA DO MAGOSTIÑO

Chegado o San Martiño e con el a época dos Magostos, no Baliño preparáramos arreo durante toda a semana para festexar e troulear o venres.

Gústanos a festa e non o podemos negar!! 

É o que hai!

Tivemos paparota e xogos, podedes ver como o pasamos e todo o que organizamos no blog de Lerín da nosa biblioteca. Pero, ademais, tivemos sobremesa sorpresa: "NUTELA CASEIRA".

Aproveitando que un dos seus ingredientes, as abelás, son froitos de outono, estación na que nos atopamos, @s cocinitas (1º e 2º) atacaron de novo e puxéronse mans á obra.

Se o queredes facer necesitades: 

- 50 gr de leite enteira

-75 gr de chocolate fondant

-25 gr de chocolate negro 90%

-100 gr de abelás

-20 gr de manteiga

-75 gr de azucre

Trituramos o azucre e reservamos, moemos as abelás, engadimos o resto de ingredientes e batemos. Reservar nun tarro de cristal no frigorífico e.... listo para untar en rebandas de pan!!

Por suposto, no noso cole compartimos todo con todos e todas, así que tras a comida, repartimos unhas torradiñas de pan coa nutela a todo o que quixo...  ñam ñam

Velaquí tedes o proceso e o resultado!! Sinxelo e riquísimo! Ademais de feito na casa!!!

TAREFAS DA HORTA

 A nosa pequena hortiña segue a crecer! A natureza é sabia pero nós tampouco esquecemos as tarefas que debemos levar a cabo para que todo siga a súa traxectoria.

Tocounos plantación e os nenos e nenas da aula de 4 e 5 anos prestáronse moi amablemente para colaborar nos quefaceres da terra. Foi a quenda dos porros!! Cantas cremiñas imos facer con eles!!😋😋😋😋😋😋

Que pracer velos disfrutar e aprender facendo!!

MARMELO CASEIRO

Seguimos coas nosas propostas para mellorar a alimentación e facela atractiva e próxima aos nosos nenos e nenas. 

Nesta ocasión @s cocinitas de 1º e 2º preparan marmelo caseiro!!

Non saiu moi consistente, tiña unha textura máis de marmelada, pero non pensedes que o desaproveitamos... Untaron unhas torradiñas de pan con queixo e por riba botaron o marmelo.

Compartíronno no tempo de ocio da mañá co resto de alumnado do cole! tiveron moito éxito!

A verdade é que aprendemos que non sempre todo sae ben a primeira, que o erro está permitido en todo na vida!! 

TARTA ANIVERSARIOS OUTUBRO: BISCOITO MÁRMORE (RECEITAS CON RUFO)

Seguimos cos nosos macro-aniversarios. Esta vez tocoulles aos nacidos e nacidas no mes de Outubro. 

Os nosos expertos e expertas en sobremesas, a rapazada de 1º e 2º de primaria, capitaneados pola súa titora e coa axuda de Bea, seleccionaron unha receita saudable do libro Grandes Receitas: O raposo Rufo (de Dani Viéitez e Iria Iglesias) os papis dos nosos compis Fiz e Lila. 

Preparáronos un marabilloso BISCOITO MÁRMORE.

Os ingredientes que empregaron seguindo a receita foron:

• leite
• fariña
• lévedo en pó
• ovos
• aceite
• cacao
• azucre

Por suposto, non olvidar lavar ben as mans antes de poñerse a manipular alimentos. É esencial manter uns hábitos de hixiene axeitados!

Velaquí tendes o Como se fixo e o resultado final.

Se vos animades a facelo, non esquezades que temos a vosa disposición o libro para empréstito na biblioteca de Lerín!📖

ACTIVIDADES NA NOSA HORTIÑA

Ben é sabido que o traballo nunha horta nunca falta e que é importante levalo a cabo para poder recoller os tan anhelados froitos caseiros.

Como o temos moi clariño, non esquecemos regar, arrincar herbiñas malas e por suposto, recoller... 

Mirade que exemplares feitiños de leitugas!! a que están espectaculares? 

A nosa maceira déunos dúas mazás ben fermosas, recollemos amorodos e ata un porro. 🍏🍏🍓🍓🍓🍓🌱

Que gustiño da ver que o traballiño ben feito e gozado trae recompensas!!

Vede a rapazada de 1º e 2º de primaria  ademais de aprender xuntos, traballan en equipo e colaboran polo ben común!

BATIDO DE IOGUR E FRAMBOESAS

Este venres durante o tempo de ocio, ademais de merendar con froita (coma en tódolos recreos no Monte Baliño), tivemos unha sorpresa....

BATIDO DE IOGUR E FRAMBOESAS 😋😋

Estaba deliciosamente rico!!

Podedes animarvos a preparalo, non pode ser máis sinxelo! So precisades, collede nota: leite, iogur natural (tamén empregamos iogur sen lactosa, para os intolerantes) e framboesas ben lavadiñas e fresquiñas. Bater todo xunto e listo!!!

Como vedes no Baliño, montamos unhas merendas moi saudables!!

Como sempre aquí vos deixamos fotiños para dar envexa... Sa eh!

ANIVERSARIOS COLE. TARTA DE MAZÁ

Este ano no cole, a rapazada do grupo de 1º e 2º está moi "empeñada" en que as sobremesas dos aniversarios comúns dos trimestres as preparan eles.

Así que sen máis, e dirixidos pola súa titora Maite, axudados en cociña por Bea dispuxeron os ingredientes necesarios e lanzáronse a aventura pasteleira elaborando unha deliciosa tarta de mazá 🍏🍏🍏🍏da que demos boa conta no comedor.

INGREDIENTES:

• dúas láminas de masa de follado fresca
• 4 mazás golden grandes (non necesita azucre xa que coa mazá é abondo)

ELABORACIÓN:

• Cubrir a bandexa do forno con papel especial.
• Untar con aceite de oliva ou manteiga o papel (pouquiña cantidade)
• Estirar a masa, pinchala e metela 5 minutos no forno para darlle un golpe de calor.
• Sacala e colocar as mazás cortadas dispostas en fila en media luna
• Meter ao forno previamente quente durante 30 minutos a 180 º 
• Decorar coas guindas.

Crema opcional!

VOCABULARY: FRUITS

Na aula de Infantil coa teacher Nati, traballaron o vocabulario das froitas en Inglés. 

Primeiro visionaron un video-canción con diferentes nomes de froitas. Tiñan que pór en marcha a súa atención, xa que das froitas citadas tiñan que lembrar o nome da súa froita favorita para posteriormente dicilo.

Para rematar a actividade, e deixando fluir a súa creatividade, moldearon con plastilina a froita seleccionada. 

Velaquí os tedes coas súas creacións: apple, pinneaple, watermelon, banana...!

Ademais os nosos artistas, noutra sesión de Inglés coa profe Nati, fixeron unhas froitas decorándoas con boliñas de papel seda. Motricidade fina a tope!!!

ESCORNABOTS SAUDABLES e ESPETOS DE FROITA SAUDABLE

Seguimos a aprender cos escornabots dentro das nosas aulas. Unha maneira atractiva, divertida e manipulativa de achegar coñecementos aos nosos pequenos e pequenas.

Esta vez Bluebot visitou a aula de Infantil na hora de estimulación da linguaxe e traballlamos o vocabulario das froitas (cereixas, limón, marmelo, laranxa, mandarina, figo...) e das árbores froiteiras (cerdeira, limoeiro, marmeleiro, laranxeira, mandarineira, figueira...)

Como xogamos? Lanzamos o un dado xigante coas árbores e segundo a que nos indicaba, programamos a Bluebot para chegar a súa froita correspondente.

O que acertaba, gañaba un escornapunto!

Ao día seguinte tivemos sorpresa saudable coas froitas: seguimos series dadas nunha tira de papel, elaboramos uns ricos ESPETOS DE FROITA VARIADA acompañados de chocolate ou caramelo.

Os nosos compas de 1º e 2º tamén se animaron!!! Mirade como lambemos!!!!👀👀👀👀😛😋😋

EXCURSIÓN VIRTUAL PROGRAMA "TI SI QUE ES UN BO PEIXE"

Como colofón final ás modalidades incluidas dentro do programa Aliméntate ben, no que participamos no Baliño, realizamos unha excursión. Unha excursión organizada polos responsables do programa "Ti si que es un bo peixe". Pero esta excursión, levounos ao mundo do mar sen nos mover do interior...como pode ser? Pois realizando unha excursión de xeito virtual.

Queredes saber todo o que fixemos este día?... Aí vai!!

Para empezar, contámosvos que realizamos a excursión en dous grupos: grupo de convivencia de 3º e 4º e grupo de convivencia de 5º e 6º.

• Comezamos o obradoiro co visionado dun video con gafas de realidade aumentada para posteriormente facer unha posta en común do visto.
• A continuación realizamos diferentes e divertidas actividades relacionadas coas especies mariñas e o mar:

1. Marisqueo: Identificación de bivalvos, medidas do tamaño mínimo das diferentes especies para valorar a importancia de cumprir e respectar os mesmos. 
2. Imos de pesca ou Hábitat de cada especie, extracción e comercialización: artes de pesca, medida de peixes e tamaño mínimo co ictiómetro, recoñecemento da frescura dun peixe, identificación de produtos da pesca (etiqueta), simulación dunha poxa   

Finalmente, rematamos este obradoiro tan instructivo e manipulativo, co reparto por parte dos monitores dun saboroso catering individualizado e entregado a cada participante por separado nunha bolsiña de papel (xenial...LIBRE DE PLÁSTICOS) na que se incluían: unha ensaladiña, un sandwich, un iogur e unha botella de auga.

A rapazada gozou das actividades plantexadas, aprendeu e adquiriu coñecementos saudables e outros que lles permiten reflexionar e ser críticos e coidadosos coas especies mariñas e comeu e compartiu unha merenda completa e sa co resto de compañeiros e compañeiras.

Moitisimas gracias aos nenos e nenas pola vosa participación e polos vosos sorrisos tras os tapabocas e por suposto, MOITISIMAS GRACIAS ÁS MONITORAS QUE NOS ORGANIZARON E DERON FORMA A ACTIVIDADE a pesares desta época non tan sinxela!!

Sigamos nadando cara adiante!!

COIDANDO DO NOSO PEQUENO HORTO ESCOLAR

Esta semana estivemos moi atarefados co coidado do noso pequeno horto escolar. Os horti-axudantes fixeron de todo para manter a nosa producción ao día e nos poder aproveitar dela o máis pronto posible.

Estamos a ter unhas altas temperaturas, polo que debemos regar a cotío. Velaquí tendes a Ana de 2º dando de beber aos tomates. 🍅🍅🍅

Por outra banda, a nosa mestra Maite, preparou quendas de regadío para que todo o alumnado participe durante os tempos de lecer, pero dun xeito organizado. Tomás e Alexander regan na quenda do seu grupo de convivencia (3º-4º) aos que lles toca esta semana. A que se lles da moi ben?? Traballo en equipo!!👌💪💪

E por último, para completar un pouquiño máis a variedade de produtos (leitugas, tomates, cebolas...), as nosas compañeiras de 4º plantaron lombarda.